వంశీ కతలు - పరుగులు

చాలా హడావిడిగా పరిగెడుతున్న రవి ని ఆగమని ఒక పోలి కేక పెట్టాడు మోహన్, తనని చూసే పారిపోతున్నాడు అని తెలీక. అయినా ఆగని రవి ని పట్టుకోవాలి అని పరుగు మొదలు పెట్టాడు మోహన్. అలా పరుగెడుతూ, నిద్ర పోతున్న బుజ్జి గజ్జి కుక్క తోక ని మట్టేసారు ఇద్దరు. ఒకడి వెనకాతల ఒకడు తోక మట్టటం తో కుయ్యో మొర్రో అంటూ ఆ కుక్క వీళ్ళ ఇద్దరి వెనకాతల పడింది. ముందు రవి, వెనక మోహన్, వీళ్ళిద్దరి వెంట గజ్జి కుక్క. డాబా మీద నుండి చూస్తున్న స్వప్న కి ఈ పరుగులు చూసి నవ్వు ఆగలేదు. ఆ కుక్క ఒకప్పుడు స్వప్న వాళ్ళ పెంపుడు కుక్క. వీళ్ళు పెట్టిన తిండి తినే అలా అయిపొయింది అని కాలనీ లో అందరు అనుకుంటారు. కాదు బొచ్చు కుక్కని కొనమంటే, స్వప్న నాన్న గజ్జి కుక్కని కొన్నాడు అన్న నిజం అందరికి తెలిసిన రహస్యం. అయినా అది వేరే విషయం.

ఆ పరుగు పందెం వీధి దాటిపోయి గతుకుల మెయిన్ రోడ్డు మీద కి చేరింది. కుంటుతూ పరుగెడుతున్న గజ్జి కుక్క ని చూసి, జాలి పది సోదర భావం తో మెయిన్ రోడ్ కుక్కలు కూడా పరుగు మొదలు పెట్టాయి, రవి మోహన్ ల వెంట.
రవి  తన పక్కనుండి వెళ్తున్న సిటీ బస్సు ఫుట్ బోర్డు ఎక్కి వెనక్కి తిరిగి చూసాడు, కుక్కలా తన వెంట పడ్డ మోహన్, ఆ వెనకాల కుక్కలా గుంపుని చూసి నవ్వుకొని బస్సు లో ఖాళి సీట్ చూసి కూర్చున్నాడు.

అలా రన్నింగ్ లో బస్సు ఎక్కక పొతే ఇంకో బస్సు లో రావచ్చు కదా అన్నాడు తన పక్కనే  కిటికీ సీట్లో కూర్చున్న స్వప్న వాళ్ళ నాన్న. 'నిజం చెప్పమంటారా, అబద్దం చెప్పమంటారా అంకుల్' అన్నాడు రవి, పాతాల భైరవి లో NTR ఫోసులో. 'ఏదో ఒకటి చెప్పు' అన్నాడు స్వప్న నాన్న, నేపాల మాంత్రికుడి లా గెడ్డం గోక్కుంటూ, బయట పోస్టర్ మీద అనుష్క పోస్టర్ చూస్తూ.

 'మోహన్ మీ అమ్మాయి కి ఇవ్వమని లవ్ లెటర్ నాకు ఇస్తున్నాడు. వాడి నుండి తప్పించుకోవటానికి ఇలా పరుగెత్తా' అని తాపిగా చెప్పాడు రవి. ఉలుక్కు పడ్డ గెడ్డం మాంత్రికుడు కిటికీ లోనుండి బయటకి చూసాడు మోహన్ కనిపిస్తే దొబ్బులు పెడదామని.  కాని అప్పటికే మోహన్ పరుగు ఆపెయ్యడం, కుక్క గ్యాంగ్ లో ఒక కుక్క వాడి పిక్క ముక్క లాగేయ్యటం కూడా ఐపోయింది. ' బాబు, తల లోపలి పెట్టండి సర్' అన్నాడు కోపంగా బస్సు  డ్రైవర్.
తరవాతి స్టాప్ లో RTC Squad వస్తే ticket లేని రవి బతుకు జీవుడా అని దిగి, mobile కోర్ట్ కి వెళ్లి ౧౦౦ రూపాయలు ఫైన్ కట్టాడు రవి, స్వప్న తనకి రాసిన లవ్ లెటర్ జేబులో తడుము కుంటూ...

కుక్క కరిచిన తనని స్వప్న వాళ్ళ నానా ఎందుకు కొట్టాడో, మోహన్ కి అర్థం కాలేదు. గజ్జి కుక్క మరి ఇంకా ఆ వీధి లో కనిపించలేదు. నేపాల మాంత్రికుడు మాత్రం ఇప్పటికి తను కొన్నది గజ్జి కుక్క కాదు, బొచ్చు కుక్కే అని వాదిస్తూ ఉంటాడు అప్పుడప్పుడు తన అల్లుడైన రవి తో. ఐతే ఒక ప్రశ్న మాత్రం ఇంకా ఉండిపోయింది. రవి ఆ రోజు ఎందుకు పరుగెత్తాడు? :-)

గమనిక: అచ్చుతప్పులని తన్నించ ప్రార్థన.