దంష్ట్రా మురరిపు వరాహస్య భవతి

అవిద్యానా-మంత-స్తిమిర-మిహిర ద్వీపనగరీ

జడానాం చైతన్య-స్తబక మకరంద శ్రుతిఝరీ |

దరిద్రాణాం చింతామణి గుణనికా జన్మజలధౌ

నిమగ్నానాం దంష్ట్రా మురరిపు వరాహస్య భవతి ||

అమ్మ వారి పాద పద్మ పరాగలేశము  - 

• అజ్ఞానుల లోపల ఉన్న చీకటికి (ని పారద్రోలే ) సూర్యుడు ఉదయించే ప్రదేశం (వెలుగుల గని). [ఉద్యద్భానుసహస్రాభా]
• సోమరులు, ఆలసులు, కార్యోన్ముఖులు కాలేని వారికి (చైతన్యమొసగే) జ్ఞానమనే పుష్ప సమూహం  నుండి జాలువారే నిరంతర మకరంద ప్రవాహము. [సుధాసృతిః]
• దరిద్రుల పట్ల చింతామణుల మాల. (చింతామణి - కోరిన కొరికలు అన్నీ తీర్చే అపురూప మణి). [చింతామణి గృహాంతస్తా]
• సంసార సాగరం లో మునిగి ఉన్నవారికి విష్ణావతారమయిన ఆది వరహాపు కోర.  [సంసార పంక నిర్మగ్న  సముద్దరణ పండితా]

పై శ్లోకం లోని ఆఖరి పాద భాగం -  దంష్ట్రా మురరిపు వరాహస్య భవతి.

ప్రళయ కల్లోల సాగరం. 

మూర్ఖుడైన ఒక రాక్షసుడు భూమిని చుట్టి పడేస్తే, దానిని సాంతం మింగేసిన ఆ సాగరం.  

ఆ సాగరం లోనుండి ఒక్కసారిగా పైకి లేచిన  బ్రహ్మాండమైన తేజస్సుతో ఆది వరాహమూర్తి. 

ఆయన మూపు చివర పెద్ద కోరలు. ఒక గ్రహాన్ని లేపి ఎత్తగల కోరలు. ఆ కోరలే అంత పెద్దవి ఉంటే, ఆ వరాహ మూర్తి విగ్రహం ఇంకెంత విశాలమైనదో ఊహించుకుందాం. 

ఆ కోరల మీద  హిరణ్యాక్షుని దుష్కార్యం నుండి  రక్షింపబడి, ఆ అపారమైన జలనిధిలో నుండి బయటకు ఉద్దరింపబడిన భూదేవి. 

ఈ దృశ్యం అంతా  ఆ పాద భాగం 'దంష్ట్రా మురరిపు వరాహస్య ' లో. 

 

ఆ దృశ్యాన్ని ఇంకొంచం పరికించి చూసే సాహసం చేస్తే -  ఆయన పాదాల వద్ద మహోత్తుంగ  తరంగాలు, నీటిలో నుండి చతుర్భుజాలతో  లేచిన స్వామి శరీరం, దాని  మీద నుండి ఆ సాగర జలాలు జలపాతాలలా కిందకి జారుతూ, స్వామి నోటిలో నుండి తెల్లగా మెరిసిపోతూ  కోరలు, వాటి మీద నీలముగా భూమి. 

అనిర్వచనీయం. ఇది కేవలం ఎవరికి వారు మనోఫలకం మీద చూసుకోవాలసినదే కానీ ఏ కళాకారుడు కూడా చిత్రించలేడు. ఏ దర్శకుడూ ఈ దృశ్యాన్ని మలచలేడు. 

'జన్మజలధౌ నిమగ్నానాం దంష్ట్రా మురరిపు వరాహస్య భవతి'

 

ఈ సంసారమనే మహోధది లో పడిపోయిన వారిని ఉద్దరించేది అమ్మవారి పాద పద్మ ధూళి. కల్లోల సాగరం నుండి భూమిని కాపాడిన ఆది వరాహపు కోర లానే! 

 

శ్లోక పాదం లో ని ఒక భాగం లోనే ఇంత అమృతం ఉంటే, ఇంత వర్ణన ఉంటే, ఇంత సౌందర్యం ఉంటే, నా వంటి అజ్ఞానికే ఇంత ఆనందం కలుగుతూ ఉంటే, ఇంక అమ్మవారి దయ పుష్కలంగా ఉండి, ఆది శంకరులను ఆసాంతం చదివి, అర్థం చేసుకున్న మహానుభావులది కదా సార్ధక జన్మ అంటే!